Открыть главное меню

Страница:Акты исторические. Том 1.djvu/44

Эта страница была вычитана

ти или представити творяща сія, яже предирѣхомъ? Никтоже не можетъ явити или представити сія: чужда[1] суть сборныя церкви. Никтоже да прелщаетъ васъ, елици въ прегрѣшеніи семъ ведетеся: но исправите себе, понеже испали есте отъ благодати. Христосъ васъ не ползуетъ, аще не възвратитеся на правое свое и доброе исповѣданіе, на неже и звани бысте и исповѣдасте предъ жертвеникомъ, на поставленіи своемъ, и предъ многыми свидѣтелми, Ангелъ и человѣкъ, и предъ Зиждителемъ всѣмъ: самъ бо рукописаніе ваше исповѣдатедное держитъ, имѣя на небеси, егоже и нося, пріидетъ въздати комуждо, якоже сдѣя и съхрани свое исповѣданіе. Сія же вся лукавая сдѣавше, и недоволно бысть вашей пагубѣ, таковое зло къ молчанію, но и еще не стыдящеся позоръствовати окаанство свое, да и еще посылаете по всей Руской земли лукавая своя рукописанія сложенія, да и еще лжу и клевету възлагаете на сборную Христову церкву и на святаго Царя, яко мьздою поставленіе творятъ святительскому сану. И рцѣте ми вы, преступивше и древнюю пошлину и своего исповѣданія и обѣщанія, еже ся[2] есте обѣщали къждый васъ на своемъ исповѣданіи, еже не пріимати иного Митрополита, но токмо иже отъ Костянтинаграда посылаемаго, отъ сборныя и апостольскыя церкви? Вы же глаголете: «всякъ даръ свершенъ, свыше есть сходяй отъ Отца свѣтомъ,» и оклеветуете истину: понеже не сущу въ васъ дару свершену Святаго Духа, но паче вашея прелести помраченіе, и развращеніе и расколеніе, еже нетокмо себе погубивше, но и христоименитое людство ведете въ пагубу душевную. Преставшу же источнику отъ теченіа, скудость бываетъ всѣмъ сущимъ на земли, словеснымъ же и несловеснымъ, и всякому земному прозябленію и плоду: такожее и вамъ, не сущей благодати Святаго Духа въ васъ, отъ источника духовнаго оскуденіе бысть вашимъ душамъ и погубленіе. Рци ми ты, паче прелщеный не-Епископе Полочьскый Ѳеодосіе, по преставленіи святаго почившаго Митрополита Кипріана, не ты ли былъ, погыбелнице, шелъ на митрополію? И ты самъ, окаанне, вѣси, елика еси пореклъ сребра и злата о томъ ставленіи. Аще бы еже по мьздѣ дѣемое было се, и тебе же бы не отслали бездѣлна, но съ уничиженіемъ великымъ и студомъ отслаша, глаголюще ти сице: злато твое и сребро твое съ тобою въ пагубу да будетъ! Егда же благоизволеніемъ Божіимъ, свѣтовася сыну моему, Великому Князю Василью Дмитреевичю, и посла къ святому Патріарху и къ священному Сбору, и къ святому Царю, яко да егоже, по Божію хотѣнію, изберутъ и пришлютъ, той есть намъ и святый Святитель Киевскый и всея Руси, по старой пошлинѣ, — еже и бысть о мнѣ смиреннѣмъ. Да и еще поискалъ такоже митрополію прелщеный Григорьи, и порицая многа имѣнія; и не послушаша его, но и еще изъ сану священничьства изверже его Вселенскый Патріархъ и прокля, и едва убѣжа казни. И како вы, погыбелници, хулу и клевету и лжю възлагаете на святую и сборную Христову церкву, и на святаго Царя? Поистинѣ, по неложному слову пророческому, «да заградятся, рече, всяка уста глаголющая на праведныя беззаконіе.» Вы же, священнѣйшая паства Христова, имѣю надежу, яко благаго Христа благодатію, и вашъ разумъ основанъ благочестіа въдруженіемъ, неподвижны сблюдетъ и немятежны церкви Божія, и никого же въ сѣти вражія вдасть. Сего ради и молю вашу любовь, паче же свѣтлици мнѣ бывайте, и бо-

  1. Въ подлин. «тужда.»
  2. Въ подлин. «еже ся истебе.»