паствы моея! сего ради, тако глаголеть Господь, не пасосте люди моя и не съхранисте, но расточисте и разгнасте, не посѣтисте сихъ; се азъ отмщеніе створю на вы, по лукавству дѣлъ вашихъ.» Дерзнуша, смѣавше съ иными, еже все смѣавше языци, и великое съвѣщати въ гнуснѣйшемъ своемъ сложномъ писаніи сице: «Всякъ даръ свершенъ есть, сходяй отъ Отца свѣтомъ[1],» смрадніи суще иже винограда Христова растлѣвшіи священници, о нихъ же пророческы речено бысть: «изыде беззаконіе отъ священикъ Вавилонскыхъ»; и «пастыріе мнози растлѣша виноградъ мой, посрамиша жребей мой, си убо межу святаго и скврънаго не разсудивше.» А понеже губителнымъ въсташа Сборомъ, все людство въ слѣдъ себе прелстиша, мняще бо лютіи свиньство свое и гордіи нечестіемъ, не быти великое зло, еже творятъ. Но лживому преумноженію некрѣпко начало и основаніе некрѣпко устроено положисте. Како да вмѣнится въ законный Сборъ, иже предѣлы святыхъ Отецъ не схранивше? О безмѣстію и погыбели вашей! Рцѣте ми, откуду избраніе се пріали есте вы творити? Нижѐ бо отъ святыхъ правилъ предано бысть вамъ, ниже отъ нзначалнаго обычая, кромѣ старѣйшины нашего. Сего ради помраченникы назвати ми убо васъ, а не просвѣтители, ниже посѣтители, ниже Епископы, паче же, чреву рабы, понеже чреву вся таковая творящи и глаголющи; и спростѣ всѣхъ, иже тако безумнѣ творящихся, якоже Орива, и Зива, и Зивея, и Салмана, и якоже сонмище Авироново, изриновены и богоненавистны васъ вмѣняемъ. И како смѣавше вы сего глаголати и писати? Еже святая Христова сборная и апостольская церкви, по иже свыше давшейся той Христовою благодатью непобѣдимой крѣпости же и силѣ, на полезно всегда строящи, и по всѣхъ убо повсюду обрѣтающихся святѣйшихъ церквахъ показуетъ бреженіе и попеченіе, яко да тыя добрѣ и по закону Господню правятся и изводятся. Якоже источникъ водный, единъ той текущь, и разливается по многыхъ странахъ и напаеваетъ и прохлажаетъ словесныхъ и несловесныхъ и вся прозябленія земная влагою раститъ и плодитъ: сице же сборная и апостольская церкви Костянтинаграда, якоже отъ источника паче духовнаго и безсмертнаго повсюду текущи, такоже и Кіевъской и всея Руси митропольи, поизначалнаго чина же и пошлины, строитъ попеченіе и бреженіе, и посылаетъ единаго Митрополита Кіеву и всея Руси. И тако должно сущимъ всѣмъ Епископомъ, Княземъ, велможамъ, священникомъ и инокомъ, и всему христоименитому исплъненію послушати его, яко пастыря и учителя духовнаго, якоже рече и самъ Христосъ: «слушая васъ, мене слушаетъ, и отметаяся васъ мене отмещется; мене же отметаяся, отметается пославшаго мя.» Вы же се смѣавше створити, и отметавшеся. Ей! сбыстся се слово Владычное на васъ, нечювственыхъ. Рцѣте мнѣ, окаанніи, аще представити можете, достоитъ ли Епископомъ таковая творити, кромѣ повелѣтелнаго писанія митрополитова? Которыя книгы Святыхъ, которое Еуангеліе, который Апостолъ васъ научи таковое нечестіе творити? Се убо сборная и апостольская церкви, отъ въстокъ солнца даже до запада, и отъ конець до конець вселенныя, учитъ божествеными и священными правилми, каковое должни суть покореніе имѣти Епископи къ сборнѣй Христовѣй апостольстѣй церкви: и никакоже нигдѣже обрѣтеся кто таковое сътворити беззаконіе, якоже вы створисте. Кто отъ васъ, окаанніи, всяко възможетъ яви-
- ↑ Сими словами начинается Соборная грамота Литовскихь Архіереевъ, о избраніи и посвященіи въ санъ Митрополита Григорія Самблака. См. Никон. Лѣт. V, 59.
