Страница:Акты исторические. Том 1.djvu/42

Эта страница была вычитана

всѣми вами, иже на святая правила разъярився и нѣкоторыя слабоумныя обрѣтши, прелщаетъ лукавствомъ своимъ, възмогше лютѣ Христову паству погубити. А понеже яже о немъ явлена быша на Сборѣ, елико смущеніе створи на Христову церкву, отъ Святѣйшаго Вселенскаго Патріарха Евѳимія и оть божественаго и священнаго Сбора изверженъ бысть изъ сану и проклятъ; и отъонуду побѣжавъ, таже отъ мѣста на мѣсто преходя, пакы ся възвращаетъ къ Литвѣ, спѣша, якоже и бысть, церковь Божію разрушити и смутити: воюетъ убо ея, низлагаетъ, развращаетъ. Таже окаанныя оны иже иногда Епископы сбираетъ; на церковь Божію, увы! начинаютъ замышленіе, не избраніемь святыхъ Отецъ, не испытаніемъ сборнымъ, не разсуженіемъ правилнымъ, но паче мучителскы, самозаконно, поставленіе его сдѣавше, якоже въ сонномъ[1] привидѣніи играюще, проявленѣ сіи спѣшаще, гнусніи, мерзскаго оного поставляютъ, и въ[2] священную одежу непотребнаго несвященнѣ одѣваютъ, еже «достоинъ» огласивше ему, иже многаго студа и лукавства достойнаго. О безмѣрной дерзости, о мерзскаго починанія! Еже ниже въ Еллинскыхь[3] священникохъ не свершашеся, таковое смѣаше

 . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Како убо стекшемуся сквръному Сбору, писанія по всей Руской земли посылаютъ, не стыдящеся нечестіе свое и беззаконіе открывающе? О! кто убо достойно въсплачетъ бывшую нынѣ бѣду? который языкъ изречетъ сдѣанная нынѣ? который слухъ кротко пріиметъ сію повѣсть? Благовременно есть и пригодно пророческое слово рещи нынѣ: «яко погыбе благоговѣинъ отъ земли и исправляяй въ человѣцѣхъ нѣсть,» сѣчивомъ бо и оскордомъ двери Христовѣй церкви разсѣкоша. Како не подивлюся неизреченному ти, Слове, долготръпѣнію? како несказанныя ти благости изреку глубину? кто възъпіетъ: пощади, Господи, людемъ своимъ, не дажь достояніе свое въ поношеніе, еже обладати его языкомъ? Кто помолится о насъ, Ное, и Даніилъ, и Іовъ (иже вкупѣ моляхуся и съчитаеми бывааху), яко да престанеть иже[4] на Христову церкву възстаемая брань, яко да другъ друга нѣкогда познаемъ и да будемъ едина часть? И надѣюся на человѣколюбіе Божіе, еже быти тому вскорѣ. Но дѣлаютъ на раменѣхъ нашихъ грѣшници, и быхомъ позорище ново, не Ангеломъ и человѣкомъ (яко доблественѣйшій въ страдалцѣхъ Павелъ къ Началомъ подвизаяся), но всѣмъ по времени лукавымъ, на всяко время и мѣсто, въ торжнщихъ, въ мѣстѣхъ, въ веселіи, въ плачѣхъ; и ничтоже тако красно слышанію, якоже Святители уничижаеми и поругаеми. Ищетъ убо Іеремія главѣ воду и очима источникъ слезъ; яко да оплачетъ по[5] достоянію Израиля: плачетъ же ся не о благыхъ..........[6]. глаголеть убо къ нему, обличенія творя къ священникомъ Богъ, глаголя: «священници не рѣша: гдѣ есть Господь? и предстатели закону моему не свѣдаша мя и пастыріе нечествоваша на мя.» И пакы тожде: «пастыріе, безумници, Господа не взыскаша, и сего ради не разумѣ вся паства и расточися. Пастыріе, рече, мнози растлѣша винограда моего, осквръниша участіе мое, еже бяше мнѣ възлюблено, створиша е пусто и непроходно.» И пакы: «о пастыріе, погубившіе и расточившіе овчи

  1. Въ подлин. «сѣ???омъ.» [Три буквы неразборчивы: «и» или «н». — Примечание редактора Викитеки.]
  2. Въ подлин. сей предлогъ опущенъ.
  3. Въ подлин. «Еминскыхъ.»
  4. Надлежало бы сказать «яже.»
  5. Въ подлин. «въ.»
  6. Въ подлин. вмѣсто поставленныхъ точекъ, написано что-то странное: «по оперствующая свиньствую.»