Эта страница была вычитана
яко да не прелстимся и преносими будемъ всякого вѣтра ученіемъ[1], въ лукаводѣйствѣ лукавыхъ человѣкъ и въ коваръствѣ прелести ихъ не пребудете[2]. Съвзыдемъ же паче со ученикомъ на блаженую гору, услышимъ нашего Пастыря глаголюща: «блюдите, да не кто васъ прелститъ.» Іоанъ таже глаголетъ: «блюдите, да не себе погубите.» И великый Апостолъ Павелъ глаголетъ: «блюдите псы, и блюдите, како ходите»; а еже глаголеть, блюдите, ничто же ино есть, но токмо къ вашему утверженію речено быстъ о иже людіе прелщающихъ, волкы суще, и покрывающихъ собе кожею, и прелщающе слабыя. Всяко же потребнѣ глаголется повсюду въ божественыхъ Писаніихъ, еже блюдитеся, и зрите, и смотрите, и бодръствуйте, нетокмо себе, но и всю паству. Ничто же умолча, еже о нашей ползѣ, божественое Писаніе. Азъ же, възлюбленіи, всредъ предложу множайшая свидѣтелства являющая, отъ божественныхъ Писаній, и отъ Еуангелія же, и отъ Пророкъ и отъ Апостолъ, и отъ святыхъ правилъ, Христу подающему, яко да заградятся всяка уста глаголющая на святыа правила неправедная; а иже покаряющіися святому Писанію и правиломъ, просвѣтятся сердца ихъ. Молю же васъ, възлюбленіи, яко да уставитъ къждый умъ свой въ[3] глаголемая, отложивше всяку житійскую печаль, да услышитъ. Начну же откуду? Или отъ глаголющаго: «Азъ есмь начало и коцець.» Іоанъ же благовѣстуя Владычнее слово, глаголетъ: (рече Господь, не входяй дверми въ дворъ овчій, но прелѣзяй инуду, тать есть и разбойникъ.» Зри коварства губителева! Онъ бо, рече, не входитъ дверми, рекше, божествеными и священными правилми, ниже бо могутъ превести свидѣтелство божественая Писанія, ниже Пророкы. Поистинѣ бо двери суть Писанія: тѣми въводимся къ Богу, тыя бо не дадутъ волкомъ входити къ намъ, възбраняютъ пагубникы прелстити нась. Тать убо есть, иже не входяй божествеными и священными правилми въ дворъ овчій, но прелѣзяй инуду, рекше, инѣмъ нѣкоторымъ путемъ и необычнымъ, по своему желанію. Слышу же Надава и Авіуда, яко страннымъ огнемъ покадивше, токмо страннымъ, потребишася мучими бывше, за еже нечестоваша,
и ниже Ааронъ отець доволенъ бысть къ спасенію ихъ, иже отъ Бога по Моисеи вторый; якоже Февда и Іуда, иже преже Христа прелщающе народы, растлиша же и растлѣшася и сами. По правдѣ бо речено: «и прелѣзяй инуду;» тать бо черезъ стѣну прескачетъ, и топчеть, и пагубная дѣетъ и творить. Мнѣ же слезити находитъ, егда помяну пагубу оныхъ окаацныхъ, иже мнящеся быти пастыріе и престолы держаще святыхъ Апостолъ и Пророкъ, но не дѣлми, ни правы апостолскыми, къ нимъ же благовременно есть рещи: «горе вамъ, вожди слѣпіи, не учени суще, ни утвержени, иже оставльше слово Божіе и предѣлы святыхъ Апостолъ, славѣ и чреву прилѣпистеся, имъже Богъ чрево и славѣ стыдѣнія ихъ, занеже млеко овець и волну[4] и мяса поядше, ни едино попеченіе створисте о нихъ, но и себе погубисте.» Понеже присноратуему Христову церкву, побѣжену же никакоже зря иже плевеломъ сѣятель, удобнѣ стваряетъ брань, внутрь сущихъ надымлѣти замышляетъ. И первѣе убо якоже[5] вѣдая, избра, несвященнаго на церковь Божію напустити оного мужа; тѣмъже убо и кая суть яже о немъ, не мое есть еже сказати
предъ
