ми бывааху, но чистаго имуще смысла, Духомъ Святымъ просвѣщахуся, и тако извѣщеніе пріимаху и научахуся Божія хотѣнія, самому Богу бесѣдующу къ нимъ и повелѣвающу и вѣщающу къ устомъ усты. Таковь бо бѣаше Ное, Авраамъ, Исаакъ, Іяковъ, и сихъ правнуци, Іовъ п Моисій. А понеже изнемогоша человѣци и недостойни бѣша просвѣщатися и учитися отъ Духа Святаго, дасть Премудрость первому Моисею божественый законъ человѣколюбець Богъ, еда како сего ради въспомннаютъ и начнутъ учитися Божія поведѣнія. Такоже и Владыка нашь Христосъ Апостоломъ убо лицемъ къ лицу бесѣдова и свою благодать учителя имъ дарова. А понеже по семъ ереси и мятежа смущенія церковнаго хотѣху прозябати починатися и обычаи наши православныя растлѣтися, благоволи написатися Еуангеліамъ, и апостольская преданія и правила Святыхъ Отецъ, яко да отъ сихъ научаеми истинѣ и не потерзаеми будемъ лжывыми лестьми мятежотворныхъ и несвященныхъ,[1] до конца растлятся хрестьанстіи наши обычаи. Хощу убо о семъ явити и извѣстити вашей любви и тъщанію о мятежю бывшемъ въ церкви Божіи отъ неподобныхъ оныхъ мужей, и яко не вси глаголеміи Епископи суть: словомъ убо мнози Епископи, нравомъ же мали, образомъ ученици Христови, нравомъ же предатели, словомъ благочестиви, дѣломъ же нечестиви, словомъ кротци, нравомъ же лукавіи, именованіемъ Святители, дѣлесы же язычници: и якоже рече Пророкъ Давидъ: «яко смѣсишася въ языцѣхъ и навыкоша дѣламъ ихъ»; и поистинѣ,[2] окааннѣхъ исполнися пророчество его. Сему же послѣдуя, и Апостолъ глаголетъ: «се убо глаголю и сводѣтелствую предъ Богомъ, не ктому вамъ ходити, якоже и прочіи языци ходятъ, въ суетѣ смышленіа ихъ помрачени умомъ; вы же не тако: познаете Христа, и не смѣшайтеся иже таковая дѣющимъ, мнози бо суть нынѣ пагубѣ учители и еще умножатся. Блюдитеся убо, възлюбленіи, яко дніе лукави суть и время своихъ слугъ поставляетъ; не чюдитеся, възлюбленіи о Господѣ, аще пастыріе образомъ суще, паче же волци быша». Къ Епископомъ бо и священникомъ бесѣдуя, Павелъ Апостолъ глаголаше: «яко отъ самѣхъ васъ въстанутъ мужіе, глаголюще развращенная»; да не убо кто васъ прелщаетъ, братіе, аще и отвнѣуду кто имѣя образа ангельскаго, внутрь же діавольскаго; сего ради Господь глаголаше: «никтоже васъ да не прелщаетъ». Азъ же вамъ, братія, предсвидѣтелствую: блюдите, да не кто васъ прелститъ, ниже отъ внѣшнихъ ниже отъ внутренихъ, ниже Епископъ, ниже священникъ, или дьяконъ или инокъ, или Князь или бояринъ, или богатъ или убогъ, или кто ни есть глаголяй развращенная, которіи приходятъ къ вамъ въ одежахъ овчіихъ, внутрь же суть волци и хыщници, которіи имѣютъ образованіе благочестія, силу же свою лицемѣріемъ покрываютъ. Вы же, възлюбленіи, не прелщайтеся отъ здодѣйства и лукавства ихъ: но якоже пріяли есте святое крещеніе отъ сборныя и апостольскыя Христовой церкви, такоже пріяли есте отъ нея имѣти Святителя единаго,—и якоже есте пріали, схраните се до конца вѣкомъ. Но близъ васъ конець вѣкомъ достиже, якоже глагодетъ Апостолъ: «и въсташа лютая времепа, и беззаконіе исполнися, и любовь многыхъ увянула, и прелщающе мнози и прелщаеми множайши.» Принеси, разгнемъ священныя книгы, въ нихъже обрящемъ путь истинный; пойдемъ въстецающе на святыя горы, Пророкы, глаголю, и Апостолы,
