и во всей Святой Горѣ, нигдѣже не поминается папино имя; а держатъ вси, милостью Божіею, ту добрую старину, еже по Божію повелѣнію, отъ святыхъ Апостолъ и отъ богоносныхъ Отецъ, по священнымъ правиломъ и по всему божественому писанію намъ преданую. А и набольши вамъ, сыну, то слышится отъ оттуду приходящихъ къ вамъ человѣкъ, понеже къ вамъ, сыну, приближше отъ насъ та страна. И самъ, сыну, вѣси, что же тѣхъ ради великихъ церковныхъ неустроеній, и до сего времени, во святѣйшей Русстѣй митрополіи не бывало Митрополита: не къ кому было посылать (Царь не таковъ, а ни Патріархъ не таковъ), иномудрствующу[1] и къ Латыномъ приближающусь, а не тако якоже православному нашему христіаньству изначала предано. А Сидорово, сыну, прихоженіе, и первое и другое, и дѣдо его, и нынѣшнее его житье самъ же потопку вѣси. Божіею пакъ, сыну, благодатію и освященіемъ Святаго Духа, господинъ нашъ и сынъ нашего смиренія, благородный и благовѣрный и благочестивый и христолюбивый Великій Князь Василей Василіевичъ, побораа по Божіей церкви и по законѣ и по всемъ православномъ христіаньствѣ, по древнему благолѣпію, разжигаася сердечною теплотою и ревнуя святыимъ своимъ прародителемъ, благочестивому святому первому православному, равному святымъ Апостоломъ Царю Констянтину и Великому Князю Владимеру, взирая въ божественаа и священная святыхъ Апостолъ и богоносныхъ Отець святаа правила и во все святое божественое писаніе, и со всѣми Святители своея земля, съ боголюбивыими Епископы и съ преподобными анхимандриты, съ честнѣйшими игумены и со многими духовныими мужми съ разсудителными, и со всѣмъ священьствомъ бесѣдуя, съединяяся волнѣ, во многія времена, и съ вами съ православными князьми обсылаясь во вся мѣста, а и нашія Русскіа земля обыскиваа старину, и по святымъ правиломъ и по разсуженіу святительскому и священничьскому, и по старинѣ, обыскавъ[2] того, что пережъ того въ Руси бывало поставленье Митрополитомъ, аще не на Москвѣ ни въ Володимерѣ, но на Кіевѣ: понеже, сыну, и о томъ добрѣ вѣси, еже въ тогдашнаа времена быдо господарьство того православнаго святаго Самодержца всея Русскіа земля Великаго Князя Вдадимера на Кіевѣ, а поставленіе бывало на Русскую митрополью Митрополитомъ, не токмо, якоже нынѣшнаго ради еже во Цариградѣ церковьнаго нестроеніа, но токмо еже въ господарьствѣхъ Русскіихъ Господарей со Цариградскими Цари негладости ради. Нынѣ же, сыну, Богу благоволившу, и по неизреченныимъ его судбамъ, и Духу Святому дѣйствующу, и по божественымъ святымъ и священнымъ правиломъ освобоженью, и по разсуженію святительскому, и по совѣту Самодержца[3] Великого Князя Василія Васильевича, и по прежному къ нашему смиренію, еже во Царьградѣ, намъ благословенію, когда во Царьградъ шествовахомъ, и по волѣ Божіей, тогды мы вмалѣ не успѣхомъ; а Исидора уже поставили на митрополію, и о томъ велми поскорбѣхомъ, что ся намъ не поспѣло. А отпущаючи Сидора на Русь, а насъ съ нимъ, и святый Патріархъ и еже о немъ божественый и священный и вселеньскій Соборъ Исидору такъ заповѣдаша, а насъ благословишя: «аще когда Исидоръ, или волею Божіею умретъ, или каково инаково о немъ что ся състанетъ, ино мнѣ грѣшному уже готово быть по немъ въ Руси Митрополитомъ.» И нынѣ тѣ Божіи своды таковыи и починились: не по нашему недостоиньству, но по Божіимъ неизреченныимъ
Страница:Акты исторические. Том 1.djvu/107
Эта страница была вычитана
