не потребуючи, ани приймуючи. Такъ намъ, Господи Боже, помози и святая евангелія Христа Господа.
6. Присяга его мл. пана марша лка Посельскои Изби.
Я Янъ Кгнѣнский, подкоморий Поморский, маршалокъ Избы Посельскои, именемъ Кола Посельского и всего рицерского чину всѣхъ воеводствъ корони Польскои и В. К. Л. и провѣнцій до нихъ належащихъ, присягаю Господу Богу всемогущому, въ Тройци святой единому, ижъ коммиссіи, которая подъ Гадячомъ дня шостого септевр. року 1658 именемъ его К. Мл. и всей Рѣчи Посполитои зъ Войскомь Запорозкимъ и цѣлимъ народомъ Великого Князства Руского отправовала, во всемъ перестерѣгати будемъ, и потомкове наши оной задосить чинити будуть, нѣ въ чомъ онои не нарушаючи, ани нарушать допускаючи вѣчними часи, жадного разгрѣшенія ни отъ кого зъ тоеи присяги моеи не потребуючи, ани приймуючи. Такъ мнѣ, Господи Боже, помози и сія святая евангелія Христа Господа.
Которіе присяги ижъ такъ скоро видруковатися не могли, оніе рукою нашою подписавши, зъ печатію коронною видати росказалисьмо. Дѣялось въ Варшавѣ, дня 10 юня, 1659 року.
II. Юраментъ альбо присяга пословъ Великого Князства Руского и Войскъ Запорозкихъ, такъ же особливе на тое отъ ясневельможного гетьмяна и всего Войска Запорозкого, Тимоша Носача, обозного, и по два сотники зъ кождого полку присланихъ, року 1659 въ день Вознесенія, при бытности короля его милости и многихъ ихъ милостей п. п. сенаторовъ и пословъ земскихъ, на сейму вальномъ Варшавскомъ въ Избѣ сенаторской, на вѣрное и вѣчное послушенство его кр. милости и Рѣчи посполитой, чрезъ особъ нижей-подписавшихся такымъ образомъ виконаная:
Присягаемъ Господу Богу всемогущому, во Тройци святой единому, на сей святой евангеліи, своимъ и Іоана Виговского, гетьмана нынѣшняго, и по немъ наступующихъ гетьмановъ Запорозкихъ, также асауловъ, судей, цолковниковъ, сотниковъ, атамановъ теперешнѣхъ и ихъ наслѣдниковъ и всего Войска Запорозкого старшихъ и меншихъ именемъ, на сіе, ижъ ми наяснѣйшому Яновѣ Казимѣровѣ, королевѣ Польскому и Шведскому, великому князю Литовскому, Рускому и наслѣдникомъ его к. милости королемъ Польскимъ и великимъ княземъ Литовскимъ и Рускимъ, и всей Рѣчи посполитой, Коронѣ и всему Князству Литовскому, вѣрними и послушними будемъ, и гетьманъ зо всѣмъ Войскомъ Запорозкимъ отъ старшихъ до найменшихъ щирою, правдивою и вѣчною вѣрностію и послушенствомъ будемъ и будуть, всякихъ протекций постороннихъ пановъ, яко особливе цара его милости Московского и иннихъ всѣхъ отступуемь и отступати, отъ нихъ отрицаемся и вѣчне отрицатися, рукъ на его королевскую милость, пана нашого милостивого, и наслѣдииковъ, королей Польскихъ и великихъ князей Литовскихъ, и цѣлую Рѣчъ поснолитую и Корону и Великое К. Литовское подносити, зъ посторонними жадного порозумленя мѣти, посельства приймовати, анѣ отправляти, анѣ посилати безъ вѣдома его королевскои милости и Рѣчи посполитой не будемъ и не будуть, подъ часъ безбытности королевской розруховъ не чинити, але совокупне зъ Рѣчю посполитою на елекціи ведлугъ звичаю обыраня королей Польскихъ обирати на панство, безъ позволеня Рѣчи посполитой никого провадити не будемъ и не будуть; надто, противъ всякихъ неприятелей его королевскои милости и наслѣдникомъ королей Польскихъ, тутъ тежъ корони Польскои и Великого Князтва Литовского и Руского, охотне и отважне здоровъе свое нести
