и мещанамъ Кіевскимъ и селянамъ, около Кіева будучимъ, ознаймую, ижъ небожчикъ славной памяти панъ Богданъ Хмелницкый, гетманъ, и все Войско Запорожское, помощію Божнею а одвагою, щастемъ и мужествомъ своимъ рицерскимъ, скинувши зъ себе ярмо неволѣ Лядской пречъ, вѣру и церковъ православную христіанскую восточную одъ великого Лядского преслѣдованыя, особливе мѣстца святые, церкви и манастырѣ Кіевскые и Украинскые многые, уволнивши и зъ пащекъ Лядскихъ вирвавши, за то Господу Богу и пресв. Богородици и всѣмъ святимъ угодникомъ Божіимъ благодареные чинячи, на обфитшую хвалу Божую мѣстцамъ святимъ, церквамъ и манастиромъ помененнымъ, яко ихъ здавна власные добра, церкви знову привернули и, яко ихъ належитые, одъ костела Домінѣканского слушне оторвавши, на церкви надалы. Межи которими и манастировѣ Богоявленія Господня Братскому Кіевскому а школамъ, при немъ будучимъ для наукъ високихъ, презъ побожнихъ а велце славныхъ годной памяти людей, то есть презъ пана Сагайдачного, гетмана Войска Запорожского, и презъ преосвященного въ Богу зейшлого отца Петра Могилу, митрополиту Кіевекого, зъ умислу побожные для оборони одъ супостатъ вѣри и церквий православнихъ, за часу гоненія ихъ фундованнымъ, яко ктиторѣ и наступци, особливе певные маетности назначили и дали, то есть костелъ Домінѣканский въ Кіевѣ и его грунта, въ Кіевѣ и за Кіевомъ будучіе, приналежности всѣ, яко-то: недавно презъ тихъ же ксендзовъ осаженное, а теперъ пустое село, названное Мостища, надъ рѣкою Ирпенемъ грунтъ ихъ увесь зъ борами, и рѣчкою Котиремъ зъ млинами всѣми, цѣлими и попаленними, на рѣцѣ Котиръ въ томъ же грунтѣ будучими, зо всѣми пожитками належачими. Которий то грунтъ, отцомъ Братскимъ належачий, починаеться одъ той жъ рѣчки Ирпеня, а кончиться по озеро за селомъ Преваркою и за полями его въ польмилѣ въ бору ведле дороги Гойтомскои, на Мостища идучоѣ, будучого вдовжъ, а впоперекъ одъ Сирца рѣчки просто презъ боръ одъ грунту церкви Василевской мѣской Кіевской, презъ того жъ Сагайдачного зфундованное, по рѣчку Водиць впоперекъ кончиться, которая идеть одъ Мощана, грунту воеводского Вижгородского. На што и листи войсковые одъ Богдана Хмелницкого велебные отцеве манастиря Братского Кіевского собѣ данные мѣлы, которые теперъ листи зъ манастиремъ и школами погорѣли. Чого всего будучи я свѣдомъ, то признаю до далшой и досконалшой волѣ и ласки его царского пресвѣтлого величества и Войска Запорожского, которые звикли зъ побожности и поважностм своей тимъ святимъ мѣстцямъ и потребнимъ опекунами быти и его вспомагати, ревнуючи давнѣйшимъ ктиторамъ и фундаторомъ побожнимъ. А въ держаню того наданя велебнихъ отцовъ Братскихъ спокойне заховали подъ суровимъ каранемъ войсковимъ, на што для лѣпшой вѣри и помочи далемъ тотъ мой листъ подъ печатю моею и зъ подписомъ руки моей велебнимъ отцамъ Братскимъ Кіевскимъ. Дѣялося въ Кіевѣ, року 1659, мѣсяця мая дня 3-го.
Василий Ѳеодоровичъ Дворецкий, полковникъ Кіевский, рукою власною.
Списокъ. На правой сторонѣ подписи въ кружкѣ написано: мѣсце печати. И той же рукой приписано: Сей унѣверсалъ до владѣныя села Мостищъ и млиновъ, на рѣци Которѣ будучихъ, Братскому Киевскому манастиревѣ наданнихъ, служачий, ясневелмож. его млсти пану Іоанну Скоропадскому гетману при конфѣрмаціи тихъ добръ былъ презентованъ, року 1709-го, мая 14.
«Семенъ Савичъ, писаръ войсковий енеральный.»
113.—1659, іюня 10. Присяги короля Польскаго Яна Казимира, чиновъ рѣчи
