скимъ, Перемислскимъ, Хелмскимъ, и пятимъ зъ Великого К. Литовского Мсцѣславскимъ, по ихъ власному порядку, въ сенатѣ засѣдати имѣеть зъ такою прерогативою и свободного голосу заживанемъ (употребленіемъ), якоже въ сенатѣ засѣдають ясневелебніи іхъ милость духовніи Римскіи. Однакъ (обаче) мѣсце его милости отцу метрополитѣ по его милости отцу арцибѣскупу (архіепископу) Лвовскомъ, а владикамъ по біскупахъ повѣтовъ своихъ опредѣляеться.
Въ воеводствѣ Кіевскомъ чини сенаторскіе не имѣють быти давани, точію шляхтѣ вѣри Греческой достойнымъ того сана; въ воеводствахъ же Браславскомъ, Чернѣговскомъ тіижде преимущества сенаторскіи перемѣнно врученни имѣють быти: такъ что по зейстю (от..деніи) сенатора вѣри Греческои имать слѣдовати сенатор ь вѣри Римской. Обаче во всѣхъ трохъ тыхъ воеводствахъ родимцамъ и добростяжателнимъ уряди повѣрени имѣють быти, кромѣ нинѣшныхъ властелиновъ.
Ради же умноженія любвѣ взаемнои, во градѣхъ коронныхъ и В. К. Л. где-колвекъ (ни есть) церкви вѣри Греческои засягли, равно граждане такъ Римскіи, яко и вѣри Греческои, общихъ волностей, свободъ заживати (употребляти) имѣють, и ни единому вѣра Греческая до магистрату да не будеть препятіемъ.
Академію въ Кіевѣ соизволяеть его королевская милость и стани коронніи устроити (возвишити), которая такими прерогативами и свободами имѣеть защищатися, якъ академія Краковская, зъ tym обаче уговоромъ, даби въ той академіи ниякихъ расколовъ Аріянскихъ, Калвѣнскихъ, Лютеранскихъ учителей и учениковъ не было и даби между студентами и прочіими учащимися жадной оказіи до звадъ (учениками и школниками ниякои вини до драки) не было. Всѣ иніе школы, якіе прежде въ Кіевѣ были, куди инуди его королевская милость перенести повелить. Другую такожде академию соизволяеть его к. милость, панъ нашъ милостивый, и стани коронніи и великое Кияженіе Литовское тамо, гдѣ оной мѣсто пристойное усмотрить, которая такихъ яко Кіевская будеть заживати (употребляти) правъ и волностей, но зъ такимъ, яко и въ Кіевѣ, имать быти устроена уговоромъ, дабы во оной расколу Аріанского, Калвѣнского и Лютеранского учителей и учениковъ не было; а гдѣ-колвекъ (нибудь) сия Академія станеть, тамъ уже никакіе училища вѣчними часи устроени не будуть.
Коллегія, училища и друкарнѣ, елико ихъ нужни будуть, безъ трудности ставити свободно будеть, и волно науки отправляти и книги друковати (печатати) всякіе въ прѣніи о вѣрѣ, обаче безъукоризни (соблазни) и безъ нарушеня (вреда) маестату королевского.
А понеже велможный гетманъ зъ Войскомъ Запорозкимъ одъ рѣчи посполитои отторженнымъ зъ любвѣ до его королевской милости, пана своего милостивого, и власного отчествія, всякихъ отступая протекцій, возвращаеться, того ради его к. милость, панъ нашь милостивый, и всѣ стани коронніе и В. К. Лит. що-колвекъ Господь Богъ на обѣ страни допустилъ престолу его святому за общіе грѣхи офѣровавши (воздавши), вѣчною амністіею, си есть забвеніемъ вѣчнымъ, покриваеть, обнадеживая всякого чина людей отъ мала до велика, никого не выключая, такъ зъ посродку Войска Запорозкого, якоже стану шляхетного, урядниковъ, яко и приватныхъ людей, тихъ обще всѣхъ, которіи ни будь якимъ образомъ при велможныхъ гетманахъ такъ зешломъ, яко и нинѣшномъ, обрѣталися и обрѣтаються, ниякого отмщеніа анѣ маестатъ панский, анѣ сенатъ, анѣ вся рѣчъ посполитая, наконець никтоже зъ приватныхъ противо имъ и всякому зособна (особенно) отъ мала до велика не будеть претендовати; но и паче всѣ огорченія и все тое, що-колвекъ во время брани дѣялося, всецѣле серцемъ
