Горе тебе, человече, яко вечная благая желавши,
А во всяком небрежении пребывавши.
Горе тебе, человече убогий, яко святых жития блажиши словом,
А по стопам их шествовати не понуждавши себе делом.
Горе тебе, человеке, яко веси царствие небесное уготованно праведным,
А не грешным в делех злых, тебе подобным.
Горе тебе, человече, яко своего жития веси минутие и конец,
А не подражает праведным, им же Христос подаст нетленный венец.
Горе тебе, человече, яко хощеши богу угодити словесы,
Но не[2] тщишися хранить заповеди божия делесы.
Ведаеш, что благо или что зло, а согрешаешь,
А житию своему всегда конец чаеш.
Бога глаголеши любити,
А по воли божией себя не хощеши понудити.
Не всяк глаголяй «Господи, господи!» внидет во царствие небесное,
Но иже пребываяй в воздержании от злых, а проходяй житие тесное.
Велня теснота плоти окаянной,
Еже быти ей от злых дел удаленной.
Ибо плотцкое мудрствование души смерть,
А ты, убогая душа, не хощеши плоть постом стерть.
Ныне дано ти время на размышление,
Потщися имети благая дела и помышление.
Помни сие: яко что ищет человек, то и обрящет,
Аще человек временная ищет, гнев божий его срящет.
Хотяй временных благ насладитися,
Имать таковый вечных добр лишитися.
Богатство аще течет, рече пророк, не прилагай сердца,
Да сподобится благодати от своего творца.
Блажит убогия свет Христос бог,
Ибо сам образ нам даде во щедротах мног.
На сие бо свет Христос нищетным образом на земли восия,
Да ты убо, человече, разумевши сия.
Яко богатый кто, а не милостив, той во веки погибает,
А творяй волю божию, милосердием сей во веки пребывает.
Горе тебе, о убогий человече, любиши временная и тленная света сего
Паче наследия вечных благ и царства небеснаго.
В злых делах пребывая и страшнаго суда не боишися,
И имея еще зде время покаяться правдою, не спешишися.
А веси, яко зде по милости божий дано ти есть время
Потщатися на истинное покаяние и отложить греховное бремя.
Аще ли, человече, прежде конца покаешися отстатием злых дел,
То по кончине введет тя Христос бог небеснаго чертога в предел,
Идеже вси праведнии радостно пребывают
И тя с собою вкупе жити желают.
Но ты со слезами творца своего бога прилежно моли,
Да открыет ти свет разума и научит своей божественной воли.
Понудися во святых божиих заповедех пребывати,
Славу и хвалу ему непрестанно возсылати.
Отцу и сыну и святому духу ныне и присно и во веки веков
аминь.
Приписка:
«Слог монаха Венедикта Буторина. Сие слово на умиление души своей
сочинил на Москве у пресвятой Богородицы в Новодевичьем монастыре,
препроводя житием (так!—С. Н.) во иночество ту пострижен 32 лета,
а слог сочинися 196 (1688) году марта в 14 день»
