1. Стрѣльцовъ во всякихъ дѣлѣхъ, опричь разбою и татьбы съ поличнымъ, судити и управа межъ ими чинити въ Стрѣлецкомъ приказѣ. А почему у стрѣльцовъ съ ихъ исковъ по суднымъ дѣламъ пошлинъ имати, и то писано выше сего.
2. А будетъ которому стрѣльцу чего искати на стороннемъ человѣкѣ въ иномъ приказѣ: и ему того своего иску на стороннемъ человѣкѣ искати въ иномъ приказѣ, по подписнымъ челобитнымъ изъ Стрѣлецкого приказу, а безъ подписныхъ челобитенъ стрѣльцомъ ни въ которомъ приказѣ ни на кого, ни въ чемъ, суда не давати. А будетъ кто учнетъ на стрѣльцѣ искати встрѣшно: и на него судъ давати въ томъ же приказѣ.
3. А будетъ учнетъ стрѣлецъ на стрѣльцѣ же искати своего и жены своей безчестья, и доищется: и на виноватомъ за стрѣлецкое и жены его безчестья, по судному дѣлу, правити деньги. А будетъ которой стрѣлецъ учнетъ бити челомъ Государю, что ему того безчестья платити нечѣмъ, и за то бы безчестье учинити ему наказаніе: и по тому его челобитью велѣти ему за то безчестье учинить наказаніе, бити его кнутомъ, чтобъ ему и инымъ такимъ не повадно было свою братью стрѣльцовъ и ихъ женъ безчестить.