Повесть о посаднике Щиле (текст на древнерусском языке)
Повесть о посаднике Щиле.
| “Повесть о посаднике Щиле”, “Сказание о Щилове монастыре, еже в Великом Новеграде”, “Повесть, содеяшася в Великом Новеграде, о избытии изо ада посадника Шила”, “О создании Шилова монастыря”, “Чудо о новгородском посаднике Шиле” |
| Дата создания: XV — нач. XVI. Источник: Повесть о посаднике Щиле • текст на древнерусском языке в транслитерации. / РНБ / F.I.323 Синодик: Лицевая рукопись. Кон. XVII - нач. XVIII в. |
Бысть в великом Новеграде чюдо страшно и удивлению достойно. Бе некий посадник именем Щил, имея у себе сына единого. Бе бо богат зело и многим даяше сребро свое, в лихву взимаше на год по деньге на новгородской рубль - новгородскую деньгу, и от того собра много, и помысли на то сребро церковь поставити и монастырь создати. И обрете место от града два поприща, и прииде ко Иоанну архиепископу, прося благословения от него на основание церкви пречистыя Богородицы честного ея Покрова. Архиепископ же даде ему благословение на таковое великое дело Божие и отиде.
Щил же приим благословение от архиепископа и посла сына своего наяти делатели и готовити вся потребная на создание церкви. Сын же сотвори вся повеления и возвести отцу своему. Щил же моля архиепископа, дабы ехал на основание церкви, оноя начало положил.
Архиепископ же моления его не презре и иде на основание церковное со всем освященным собором, и с ним множество народа, и основание церкви положи со освященным собором.
Щил же по совершении церковнем и основании постави трапезу велию, и добре учредив, архиепископа дарми одарив, и отпустив во град с великою честию. А сам в дом свой и отиде, славя Бога.
Архиепископ же приехав в дом своя Софии, и прият книги, и чтяше правила святых отец, и нача разсуждати в себе: «Вдав благословение Щилу, а ведая его богата суща и мздоимца». Понеже не вопроси его, от коего собрания такое великое дело замысли, и о том архиепископ в великом недоумении бысть и в скорби.
Щил же нача созидати церкви. По совершении же церковнем прииде ко архиепископу Иоанну и моли его, дабы освятил храм той. Архиепископ же повеле ему с собою внити в тайную храмину.
Щил же вшед в тайную храмину, и рече ему святый Иоанн архиепископ: «Повеждь ми, чадо, не скрый Господа ради, от коего собрания своего сицевое дело начинаеши?» Щил же от страха и ужаса паде к ногам святителя и глаголя: «Согреших, отче, прости мя. Мнози же людие прихождаху ко мне, взимаху сребро, и даяху ми в лихву на 14 гривен, и на 4 деньги, на год по деньге. И на то сребро создах церквь и монастырь оградих. И ныне, владыко, что ми повелеваеши?» Архиепископ же глагола ему: «И ныне ти повелеваю, устрой себе вся погребальная: срачицу и саван, и вся суть на погребение мертвым; исповеждься отцу своему духовному, вся согрешения своя; и в погребальных ляги в созданнем своем гробе; и надгробная повели над собою пети. Всемогий же Бог открыет, елико хощет; а мы, чадо, готови будем со всем собором».
Щил же, слышав от святителя, плача и рыдая. И вскоре устроив гроб и погребальная, и исповеда вся согрешения отцу своему духовному, и скрыйвся во гробе; и соборне над ним певше надгробная пения. И внезапу Щил во гробе умре. И разседеся мост церковный, и не обретеся гроб пред ними, и бысть ту пропасть велия. Святитель же прииде на освящение церковное и видев страшное оное видение, и повеле изуграфом вапы на стенах писати церковных над пропастию в подобие образ Щилов. Сам же от страха и ужаса отиде в дом святыя Софии и неосвященну церковь повеле запечатати, дондеже изволит Бог, той и сотворит.
Сын же Щилов плача и рыдая, и прииде и припаде к ногама святителя, и рече: «Святитель великий, помози ми лишения ради отца моего. Что ми повелиши, да сотворю». Архиепископ же повеле ему в посте и в молитве пребыти, и рече: «Еще заповедаю ти, чадо, 40 дней да литоргисают у 40 церквей. Даждь священником довольно, и причетником, и нищим, и темничником; и в тех 40 днех на всяк день понахиды поют, и литургии служат неизменно. И на распутиях никого не минуй: ни алчна, ни жадна, ни нага; да и монастрырь препитай, елико возможно. И тако сотвори, и прииде к нашему смирению и возвести ми о сем».
Сын же Щилов повеле литургии служити 40 дней лишения ради отца своего и милостыню нищим довольно давати. И сотврив всю 40-цу, елико заповеда ему святитель.
Сын же Щилов прииде ко архиепископу и возвести ему, что сотворих лишения ради отца своего. Вторицею повеле ему творити, якоже прежде сотворих 40 дней.
Архиепископ же посла архидиакона досмотрити в церкви Щиловы пропасти. Архидиакон же виде Щилова гроба наруже немного, и отиде запечатав церковь, и возвести архиепископу чюдо сие о нем.
Архидиакон же прииде и возвести великому святителю, что Щилова гроба наруже немного видеть. Архиепископ же повеле Щилову сыну в посте и в молитве пребыти и творити еще и вторую четыредесятницу: «Такожде сотворив, и прииди к нашему смирению, и возвести о сем».
Архиепископ же посла того же архидиакона досмотрити Щиловы пропасти. Архидиакон же прииде и видев того гроб половина наруже, и прииде, и возвести архиепископу чюдо сие.
Cын же рекомого Щила прииде ко архиепископу и возвести ему, еже сотворих лишения ради отца своего по повелению его, елико заповеда ему святитель.
Архиепископ же призва Щилова сына и повеле ему третию четыредесятницу творити, и повеле ему в те дни пребывати в молитве и в посте. И творити повеле ему ту четыредесятницу, вдвое того больши давати Божиим церквам и нищым, и странным.
Сын же Щилов четыредесять дней подаях Божиим церквам, священником и причту, и нищим, и темничником, и странным - больши прежнего вдвое.
Архиепископ же посла того же архидиакона в третие досмотрити того великого чюдеси.
Архидиакон прииде в церковь и видев той гроб наруже весь, и возвести святителю чюдо сие.
Щилов же сын повеле служити лутургии 40 дней лишения ради отца своего, и милостыню довольну даяше, во всю 40 дней. Елико заповеда ему святитель, то и сотвори.
Сын же Щилов прииде ко святителю и возвести ему, что сторворих лишения ради отца своего всю 40 дней.
Архиепископ же повеле над ним собою пети надгробная пения всему освященному собору, и погребе его сам со освященным собором с великою честию; а храм той освяти сам со освященным собором. Во славу Отца и Сына, и Святого Духа. Аминь.