Се приѣха Иванъ Нибуръ из Люпка посольствомъ, Иньца Вландерь и Федоръ Куръ из Гоцького берега, и[з] заморья, из Ригѣ Тилька Нибрюгѣ, изь Юрьева Еремѣ[и] Кѣглерь и Винька Клинъкродъ, ис Колываня Григорья Вить, и от всихъ купьцовъ заморьскыхъ и се сторонѣ поморья к посаднику Тимофѣю Юрьевицю и тысяцькому Микитѣ Федоровицю, ко всему Великому Новугороду. А повѣстуете тако: намъ с вами опришьни миръ, взялѣ есте у нашихъ купцовъ товаръ в Новѣгородѣ у юрьевъцовъ и в [ин]ыхъ городовъ и на сомъ поморьи, и на опаснои грамотѣ, что есте к намъ прислалѣ за посадницею пецатью Василья Ивановица и тысяцького Григорьи Ивановица. И посаднике и тысяцькыи и весь господинъ Великы Новъгородъ, смотрѣвъ в грамотѣ в старѣи в заморьскѣи в хрестнѣи и въ пасъ свои, за и до Новугороду заморьци с нѣмѣцькыми купци миръ опришьнии и гра[мо]тѣ опришьнии, тѣ товаръ, что в Ругодивѣ порубилѣ, и противъ того товара повеле Новъгородъ взяти товаръ своеи братьи. И посадникъ и тысяцькыи и весь господинъ великыи Новъгородъ повелѣша товаръ дати своеи братьи, и Федору, и Михаилѣ, и Василья, и Тереньтѣю, и Смену, и Сидору, Ильинымъ дѣтемъ. Ивану Нибуру и Иньцѣ Вланьдерь и Федору Куру из Гоцького берега, заморьскому послу, и Тилькѣ из Ригѣ и юрьевьскому Еремѣю и Винькѣ, ис Колываня Григорью, вѣдатися имъ [самы] с тымы истцѣ своимы купьци, цѣ[и] товаръ. [Тѣи товаръ], что в Ругодивѣ порублене у новгороцкыхъ купьцовъ, у Федора, и у Михалѣ, у Василья и Терентѣя Иль[и]ныхъ дѣтей и у ихъ друговъ; а то Новъгородъ увѣдается с ругодивци, кто у ихъ товаръ поимале. А что грамота опасная за посадницею пе[ца]тью Василья Ивановица и тысяцького Григорьи Ивановица, а то есме отдалѣ Новугороду. А что о другои грамотѣ, о которо[и] Новъгородъ говорить, за Олексѣевои владыцнею пецатью и за посадницею Васильево[и] Федоровица и тысяцького Богъдана Обакуновица, а та грамота Ивану и его другамъ выдати; или не изанаидуть, не поминати ни въ вѣкы тои грамотѣ опаснои, а по томъ за[мо]рьскымъ нѣмѣцькымъ купьца[мъ] и на сомъ поморьи ничто не надобѣ, ни поминати до новгороцькыхъ купьцовъ, до Федора, и до Михаилѣ, и до Василья, и до Терен[т]ѣя, и [до] См[е]на, и до Сидора, и до Ильиныхъ дѣтеи, и до ихъ друговъ, и до ихъ племени в томъ товарѣ ни и въ вѣкы. А что буде сопналося купьцю с купьцомъ с обѣ половинѣ, или по семъ сопнется, а то знати исцю исца, исправа имъ да[ти] по хрестному целованию на обѣ половинѣ и по старому доконьцанию. Что Иванъ Нибуръ люпскыи повѣстовале и его дружина Иньца Вландерь и Федоръ Куръ заморьскыи посолъ, и на сомъ поморьи Тилка из Ригы, и Еремѣи и Винька изь Юрьева, ис Колываня Григорья о своеи божьницѣ, [ч]то дворъ ихъ погорѣле, что у ихъ божьницъ пакость учинилась, аже гдѣ из[н]аидуть тои згыбелѣ или тать или товаре, что ни наидуть, а то Великому Новугороду, обыскавъ, дати исправа на томъ товарѣ и на татеи по хрест[н]ому целованию безо всякои хитрости; а нѣмьцомъ взяти бес пенѣ; или не будеть, в томъ Новугороду измѣнѣ нѣту. А такоже Ивану Нибуру изь Люпка, Иньцѣ Вландерь и Федору Куру, нѣмѣцькымъ посломъ, искати, что побилѣ розбоиникѣ на Невѣ Матьфѣева сына и его друговъ и товаръ отъималѣ; аже наидуть что с того товара, выдати нѣмьцо[мъ] Новугороду по хрестному целованию; или не наидуть, в томъ нѣмьцамъ измѣнѣ [нѣ]туть. А пеня гдѣ зацнется, ту ея коньцати. А се которое орудье завяжется въ обидѣ ромежи Великого Новагорода с [с]вѣскымъ короломъ, или съ велневицами, или с пискупомъ рискъмъ, или с пискупомъ юрьевьскимъ, или с пискупомъ островьскымъ, или с ругодивци, или розбоиникы на морѣ, а то купьцамъ не надобѣ. А купьцамъ нѣмѣцькымъ путь цисть сквозѣ Новгороцькую волость, горою и водою, в Новъгородъ приѣхати и отъѣхати бес пакости. А новгороцькымъ путъ цистъ на Гоцькы берегъ, по пискуплѣ земли юрьевьского и по его городамъ, горою и водою путь цистъ, въ Юрьево приѣхати и отъѣха[ти] бес пакости. А купьцамъ торговати по старынѣ, с обѣ половинѣ. А что подъ пискулимъ городомъ колода цересъ рѣку за замъкомъ, а туды новгороцькому [купьцю] путь цистъ. А на томъ дѣлѣ о всякомъ дѣлѣ, которое переду псано, посадникъ Тымофѣ Юревиць и тысяцькы Микита Федоровиць на томъ хрестъ целовали за весь Новъгородъ, какъ то держати по старынѣ, в хрестное цолование, безо всяко[и] хитрости. И такоже послы заморьскыи из Люпка Иванъ Нибуръ, из Гоцького берега Иньца Вландерь и Федоръ Куръ, из Ригы Тилька Нибрюгѣ, изь Юрьева Еремѣи Кѣглерь и Винька Клинъкродъ, ис Колываня Григорья Вить хрестъ целовалѣ по сому доконьцанию и по старому хрестному целованию держати безо всякои хитрости.
|
Это произведение не охраняется авторским правом. В соответствии со статьёй 1259 Гражданского кодекса Российской Федерации не являются объектами авторских прав официальные документы государственных органов и органов местного самоуправления муниципальных образований, в том числе законы, другие нормативные акты, судебные решения, иные материалы законодательного, административного и судебного характера, официальные документы международных организаций, а также их официальные переводы; государственные символы и знаки (флаги, гербы, ордена, денежные знаки и тому подобное), а также символы и знаки муниципальных образований; произведения народного творчества (фольклор), не имеющие конкретных авторов; сообщения о событиях и фактах, имеющие исключительно информационный характер (сообщения о новостях дня, программы телепередач, расписания движения транспортных средств и тому подобное). |
|