Канон молебен (Кирилл Туровский)/Песнь 1

Канон молебен/Песнь 1
автор Кирилл Туровский (1130—1182)
Источник: agios.org.ua[1]


Канон молебен


КАНОН МОЛЕБЕН.



Творение Кюрила грешнаго, глас 5:

Песнь 1. Ирмос:

‹1›


Моисейскую поминающе, о душе, десницю,
бежи грехолюбиваго Иегипта
и разумнаго фараона отверзися работы,
да крестную приимеши палицю
и страстное пройдеши море
смереньем, вопьющи:
поим Господеви,
славно бо прославися.

‹2›


Аз есмь обличитель
сущих во мне зол деяний,
имиже прогневах Христа,
вся Того преступив заповеди,
и вся ныне писанью предах помыслы моя,
словеса же и делеса,
скверны вся и беззаконья
на слышанье всему миру.

‹3›


Доколе вязиши, убогая душе,
объята телесными страстьми,
обидою и немилосердьем,
гордынею и пьянством?
Си суть вражья тенета,
иже тя живу до ада сведут.
Но возпи покаяньем: О Христе мой!
Расторгни ми съуз греховьный и спаси мя.

‹4›


Якоже немолчно славят
огнедохновеньными гласы серафимстии
полцы Тресвятую Троицю,
всея твари Сдетеля,
то и я припадаю,
прося отпуста многых ми грехов:
о милостивый Творче!
Поне наконец спаси мя.

‹5›


Яко уродивыя девы,
не имам покаяннаго светильника,
ни стяжах масла милостивнаго,
но всуе толку
затвореном от мене дверем;
но, о, Мати Божия,
избави от мукы лютыя
убогую ми душю.



Примечания

  1. Источник: Творения святаго отца нашего Кирилла, епископа Туровскаго с предварительным очерком истории Турова и туровской иерархии до XIII века. – Издание Преосвященнаго Евгения, епископа Минскаго и Туровскаго. Киев: В Типографии Киево-Печерской Лавры, 1880. – с. 246-264.