Е́же Дух Святы́й дре́вле пе́рстом Боже́ственных свои́х проро́ков и апо́столов написа́ сло́во, сие́ ны́не при ми́рном и благополу́чном госуда́рствовании ВА́ШЕГО ИМПЕРА́ТОРСКАГО СВЯЩЕ́ННЕЙШАГО ВЕЛИ́ЧЕСТВА в душеспаси́тельную по́льзу всего́ правове́рнаго христиа́нскаго наро́да, еди́ному первообра́зному и сла́вных о́ных и Богому́дрых седми́десяти двои́х толко́вников, с Евре́йскаго, и́мже сам Бог глаго́ла, язы́ка на Гре́ческий прево́ду: друго́е самонача́лному своему́ апо́стольскому пи́смени Гре́ческому же, согла́снее и тща́телнее, и ве́рнее на Славе́нском язы́ке испра́вленное, и печа́тным тисне́нием в кни́жном сем соста́ве изображе́нное, пе́рвее всех, и па́че всех досто́йнее и пра́веднее ВА́ШЕМУ ИМПЕРА́ТОРСКОМУ СВЯЩЕ́НЕЙШЕМУ ВЕЛИ́ЧЕСТВУ посвятити́ся до́лженствует. Вины́ сего́ три суть, вся же благослове́нныя, или́ па́че рещи́ зако́нныя. Пе́рвая, что я́коже сло́во в кни́зе сей содержи́мое всех писа́ний, ели́ка не суть свя́та и душеполе́зна, есть свяще́ннейшее и душеполе́знейшее : не бо про́сто и во́лей челове́ческою бысть, но со́бственейши от Ду́ха Свята́го, свиде́телствующу ✡первоверхо́вному✡2Пет. 1:21 апо́столу, просвеща́еми, изглаго́лаша е святи́и Бо́жии челове́цы, и тех всех нача́ло, основа́ние же и ка́мень краеуго́льный: та́ко и ВА́ШЕ ИМПЕРА́ТОРСКОЕ СВЯЩЕ́ННЕЙШЕЕ ВЕЛИ́ЧЕСТВО Пе́рвейшая и еди́на еси в Христиа́нских Госуда́рех БЛАГОЧЕСТИ́ВЕЙШАЯ МОНА́РХИНЯ, и́стиннаго Богове́дения и Богопочита́ния, ку́пно и благове́иства всем православноимени́тым христиа́ном пресве́тлый на СЕБЕ́ о́браз Показу́ющая. Втора́́я, что себе́ толь дража́йшее сокро́вище, в не́мже вся, я́же ТЕБЕ́, и всему́ достоя́нию ТВОЕМУ́ и благооти́шному в ми́ре всем житию́, и к непрело́жному небе́снаго блаже́нства стяжа́нию потре́бная триипоста́сный положи́ Бог, к я́встенейшему в Держа́ве ТВОЕ́Й от высокосла́вных в ТВОИ́Х Вседража́йших РОДИ́ТЕЛЕЙ нача́ло восприе́мшее, ТЕБЕ́ к коне́чному открове́нию, я́ко Зако́нной ИХ ко всему́ НАСЛЕ́ДНИЦЕ, по насле́дию оста́ся. Тре́тия, что сие́ толь знамени́тое де́ло, я́коже со́бственным ТВОИ́М Высокоповели́тельным тща́нием и настоя́нием усе́рдным, та́ко и ВЫСОКОМОНА́РШИМ ТВОИ́М со́бственным иждиве́нием свет уви́де.
А́ще же и долговре́менное изда́ние и книг сих Богодухнове́нных ожида́ние бы́ло, но и в том прему́дрый и неизсле́димый Боже́ственный про́мысл со́бственно показа́л себе́, да я́коже про́чая дела́ Высокосла́вных ТВОИ́Х Вседража́йших РОДИ́ТЕЛЕЙ соверша́еши, и сла́ву ИХ сла́вою ТВОЕ́Ю исполня́еши: та́ко и в сем, ничи́мже ме́ншем от о́ных, а́ще и па́че всех вя́щшем, я́ко пря́мо к прославле́нию всесвята́го и́мени Бо́жия, и ко утвержде́нию в ве́ре, и благоче́стии всея́ держа́вы ТВОЕЯ́, и всех вне́шних единове́рных с на́ми, и о ТЕБЕ́, а́ки о Со́бственной свое́й МОНА́РХИНЕ ра́дующихся, и хва́лящехся, и на ТЕБЕ́ по Бо́зе всю наде́жду невреди́маго своего́ в правосла́вии пребыва́ния полага́ющих, простира́ющемся, при ТЕБЕ́ благополу́чно соверши́вшемся, ТЫ Еди́на прославля́ешися сла́вою до сконча́ния ми́ра процвета́ти иму́щею. И вои́стину таково́е ны́не на ТЕБЕ́ собы́стся Бо́жие благоволе́ние в де́ле книг сих Свяще́нных, яково́е иногда́ в созида́нии хра́му Вы́шнему в Иерусали́ме, на прему́дром о́ном царе́ Изра́илском, сы́не Дави́довом, Соломо́не. А́ще бо и сам Дави́д жела́нием жела́ше созда́ти его, но Бог честь о́ную, и хвалу́ от Дави́да принесе́2Цар. 6:5,
12, 13, 14 Соломо́ну: та́ко и высокосла́вных ТВОИ́Х Вседража́йших РОДИ́ТЕЛЕЙ Бо́гом вдохнове́нное жела́ние и всеусе́рдное жела́ние то́йжде недове́домый в судба́х свои́х Госпо́дь в ТЕБЕ́ испо́лнити, и ТЕБЕ́ похвало́ю се́ю, че́стию и прославле́нием Всепресветле́йшаго И́мени ТВОЕГО́ ны́не и в буду́щия ве́ки благослови́ всеще́дро.
Приими́ у́бо Благочести́вейшая МОНАРХИ́НЯ, всми́лостивейше труд сей, Бо́жиим поспе́шеством, ТВОИ́М же со́бственным ща́стием, ны́не соверше́нно сие́́ окончавшийся, и утверди́ ВЫСОКОМОНА́РШИМ ТВОИ́М повеле́нием, употребля́ти его́ в защище́ние це́ркви святы́я, в душеспаси́тельную по́лзу правосла́внаго достоя́ния ТВОЕГО́, и всех единове́рных с на́ми, в позна́ние же и́стины, и ума́ просвещ́ение, тмо́ю неве́рия, ересе́й, и раско́лов помраче́нных: Нас же всеусе́рдных и смире́нных Богомо́лцев твои́х, в де́ле сем труди́вшихся, и всю це́рковь святу́ю кро́вом крил ВЫСОКОМОНА́РШИЯ ТВОЕЯ́ ми́лости и благопрезре́ния, не преста́ни, я́коже и твори́ши, покрыва́я и защища́я, к то́йжде Бо́жией, ТВОЕ́Й, и благочести́ваго Скиптродержа́вия ТВОЕГО́ сла́ве.
Такова́ дедика́циа ЕЯ́ ИМПЕРА́ТОРСКОМУ ВЕЛИ́ЧЕСТВУ от Святе́йшаго Прави́телствующаго Сино́да поднесена́ в 1751 году́.