також и вы соборовъ жадныхъ не чинили без битности его корол. милости. В тотъ часъ было забуреня и плачъ всемъ великий.
В суботу постановлене творили — церковное правило, яко се мают справовати во церквахъ, со крестами за Муховецъ реку до монастыря вси отцы ходили, тамже было дивно зрети.
В недѣлю по службе Божей было выволане и проклинане владыки илвовского, также и архимандрита его, што страшно слышати и жалосно велми то поведати, яко се тамъ деяло. Тут же седячи отецъ Михайла митрополит показовал лист писаный от велможнаго княжати Соломерецкого через посланца его.
В понеделокъ духовное право было з великимъ жалем, иж маят ехати вес собор до его королевской милости о всехъ справахъ.
Второк [рокъ] розехалися з Берестя: митрополитъ ехалъ до монастыра Супресля.
