38. Паче же блюди словесъ его, не дажь ни единомоу словеси его пасти на землю: дражьша бо бисера соуть святая словеса.
39. Праздьникы же стыихъ почьсти, не самъ оупиваяся, нъ алчьныя и жядьныя накърмляя.
40. Знаемыи твори домъ свои ништиимъ, въдовицямъ, сиротамъ, неимоуштиимъ кде главы подъклонити.
41. Богатъ ли имѣеши домъ свои, хоудъ ли, вьсе то бжиемъ помыслъмъ, нъ потъштися вьсего имѣя.
42. Не рьци бо имѣнию своему: мое есть; нъ рьци: пороучено ми есть на мало днии, да акъ клучарь пороученое ти раздаваи, яко же велить пороучивыи ти: тѣмь же, еже ти далъ вышьнии, то вышьняаго ты имѣние сътвори въ немь.
1. Лѣпо есть члвкоу имѣти паче вьсего житія, да не прилежить имѣньи зѣло, нъ тѣлеси въздьржяніе, оудобрение норовоу, гласоу оумиление ї оудобрение; ѣдение и питие безъ говора, съ оудьржяніемь.
2. Предъ старьци мълчание, прѣдъ моудрыми послоушяние, съ тъчьныими любъвь имѣти, съ меньшими любъвьное съвѣщание.
3. Отъ плътьскыихъ и любосластьныихъ вештии бѣгати; мало глаголати, а множѣе разоумѣвати, не дьрзоу быти словъмь, ни прѣрѣковати въ людьхъ.
4. Не скоро въ смѣхъ въпадати; соромяживоу быти, долоу очи имѣти, а (душу) горѣ, не противоу отвѣщавати.
5. Послоушьливоу быти до съмьрти, троужятися до съмьрти, поминати присно страшьное и въторое прїшьствие и днь съмьртьныи.
6. О надежди радоватися, молитися непрѣстаньно, при вьсемъ Бога хвалити, (в)ъ скърбьхъ тьрпѣти, къ всѣмъ съмереноу быти, величяния бѣгати, говѣиноу быти. Блюсти срдце отъ помыслъ злыихъ, събирати имѣние на нбсьхъ, законъ хоронити, любити Бога вьсѣмъ срдцемъ и блїжьняго яко самъ ся.
