7.—1391—1397. Настольная грамота митрополита Кипріана Новгородскому Архіепископу Іоанну, о подсудимости ему духовенства, неприкосновениости Софійскихъ отчинъ и пошлинахъ церковныхъ.
Се язъ Кипріянъ, Митрополитъ Кіевьскій и всея Руси, по преданью святыхъ Апостолъ и святыхъ Отець уставу, еже то уставили предѣлы церквамъ Божьимъ, митропольямъ и епископьямъ, да еже что потягло къ которой митропольи или къ епископьи манастыреве, игумены съ черньци, попы, дьяконы и всякъ церковьный человѣкъ, то вси подъ властью, въ послушаньи Святителю: никтоже да не смѣеть ни единъ крестьянинъ, ни малъ ни великъ, въступатися въ тая дѣла. Аще ли который отъ тѣхъ игуменъ, или попъ, или чернець иметь отъиматися мірьскими властелины отъ Святителя, таковаго божественая правила извергаютъ и отлучають; а кто по нихъ иметь вступатися, того не благословляють. А что погосты и села и земли и воды и пошлины, что потягло къ церкви Божьи, или купли, или кто далъ по души памяти дѣля, а въ то ни единъ христіанинъ не въступается; а кто въступится, того не благословляютъ божественая правила. Сего ради, и язъ Кипріянь, Митрополитъ всея Руси, по тѣмъ божественныъ правиламъ, далъ есмь сію свою грамоту въ епископью въ Новгородскую, въ Святую Софью, и сыну своему, Владыцѣ Архіепископу Великаго Новагорода Ивану: да елико есть манастыревъ, игумены да будуть у него въ покореньи и въ послушаніи и весь чинъ священническый; такоже и погосты и села и земля и воды, со всѣми пошлинами, что потягло при первыхъ Владыкахъ къ той еппскопьи, къ Софьи Святой, какъ при первыхъ Владыкахъ тамо что ни было, тако и нынѣча потянеть къ Святѣи Софьи и ко Владыцѣ Ивану. А никто бы не смѣлъ въступатися въ церковныи пошлины, ни въ земли ни въ воду, блюлся бы казни святыхъ правилъ; а кто будеть въступился, а тотъ бы престалъ[1] отъ сего часа. А кто послушаеть святыхъ Апостолъ правилъ и святыхъ Сборовъ преданье н мое поученіе, на томъ милость Божія и Пречистыя его Матери и мое благословленье; а кто не послушаеть моего благосдовенія и покушаеться обидѣти церковь Божью, а на томъ не буди милости Божіи и Пречистыя его Матери, ни моего благословенія. А дана грамота на Москвѣ, мѣсяца Августа въ 29 день.
Изъ рукописи, подъ заглавіемъ: Іосифа Волоколамскаго о Новгородскихъ еретикахъ, и Посланія Митрополитовъ Кипріана и Фотія во Псковъ (in fol., XVI вѣка, грам. 14, л. 449—450), хранящейся въ Румянцовскомъ Музеумѣ подъ № 204.
Примѣчанія править
- ↑ Въ подл. «предсталъ.»
